Еңбек ардагері, Қазақстан журналистер одағының мүшесі, полковник Хамзин Қобыланның бірнеше кітабы оқырманға таныс. 2004 жылы шыққан — «Ақ тілектер аясында», орысша аудармасы «С любовью к земле» — атты кітаптарын облыс жұртшылығы жылы қабылдап, жақсы атап жүр. Қобылан Хамзаұлының шығармашылық еңбегі өлең жазатын өнерімен ұштасып жатады. Біраз өлеңдері бұрын шыққан кітаптарында жария етілгенін білеміз. Қолымыздағы «Өмірден өнеге» атты өлеңдер туындысында автор таңдамалы шығармаларын жинақтаған екен. Өлеңдері алуан түрлі тақырыптарды қамтыған, айтқан сөздері құнды, ұйқасымдары жеңіл, оқушысын еліктіріп, тартып отырады. Шығармаларында өнегелі сөздер мол, оқушының ойын қозғайтын өсиеттер бар. Қорытып айтқанда, өлеңдер жинағы тәрбиелік мәнімен құнды, сонысымен үлкенге де, кішіге де керекті дүниелік.