Қобылан Хамзаұлы «ССРО МВД мекемелеріне еңбегі сіңген қызметкер» — атағына ие болған милиция полковнигі. Соңғы он жылдан астам уақыт жазушылық өнеріне ниет қойып, бірнеше кітаптар жазып жариялаған, «Қазақстан журналистер одағының мүшесі». Бұл кісі ислам дінінің қағидаларын жақсы білетін, талаптарын тегіс орындап жүретін зейнеткер. 2006 жылы арнайы сапармен Мекке-Мадина шаһарларында болып, қажылық парызын атқарып келген — қажы. Қобылан Хамзаұлы айтар ойларын қара сөзбен де, өлең өрнектерімен де жатық жазып жеткізе алатын өнерімен қалың жұртшылыққа танымал жазушы. 2005 жылы жарияланған «Өмірден өнеге» атты өлеңдер жинағын оқыған ел, маңызды, өнегелі, өрелі ойларына разы болғандықтарын молынан жеткізген. Жарияланып отырған «Ұрпағыма ұлағат» — атты өлеңдер жинағы да мазмұнының тереңдігімен, ұлағатты, ұйқасымды ойларымен оқушысын көптеп табатынына сенеміз.