Жазушы және ақын Мәжит Дәулетбаев — 1920-30 жылдар ішінде қалам тартып, қазақ совет әдебиетінің өркен жаюына өзіндік үлес қосқан, артына үлкен мұра қалдырған көрнекті қаламгер. Жазушының «Қызылжар» романы, «Партизандар» повесі кезінде жоғары бағаланып, ұлт әдебиетінің елеулі табыстарының қатарында саналған. «Қызылжар» романы — революция алдындағы қала тұрмысын, қазақ жұмысшыларының таптық сана-сезімінің оянып, өсуін, Совет өкіметін орнату жолындағы табанды күресін, халықтар достығын шынайы суреттейтін алғашқы туындылардың бірі. «Партизандар» повесі де өзінің тақырып, мазмұн бітімімен ерекшеленетін шығарма. Бір топ ауыл кедейлері бірігіп партизандыіқ топ құрып, жақындап келе жатқан Қызыл Армияға іштен көмекшілік роль атқаруын автор бейнелі де бедерлі көрсетеді.