ҚР мәдениет қайраткері, Қазақстанның құрметті журналисі Амандық Жантеміровтың бұл кітабы осыған дейін жарық көрген «Атақоныс-Ақтомпақ», «Қызылжар өңірінің өшпес шежіресі», «Жеті атаңды білесің бе?» деп аталатын еңбектерінің жалғасы іспеттес. Өйткені автордың аты аталған кітаптарына Солтүстік Қазақстан облысының Жамбыл ауданына қарасты Қарақамыс ауылының тарихы, Керей руы ішіндегі Қапсыт шежіресі енгізілсе, бұл еңбекте қазіргідей нарық заманының қыспағына шыдай алмай тұрғындары тарыша шашылып, екі қолға бір күрек іздеп жан-жаққа көшіп, жабылып жатқан елді-мекендердің кебін кимес үшін туған ауылын сақтап қалу жолында атқарылып жатқан үлкен іс-шаралар туралы баяндалады. Сондай-ақ кітапқа жерлестеріміз, академик-жазушылар Сәбит Мұқанов пен Ғабит Мүсірепов, өңіріміздің басқа да тұғыры биік тұлғалары туралы, Ислам дінінің құндылықтары жайлы мақалалар, сұхбаттар, автордың қызығы да қиындығы мол журналистік қызметі туралы естеліктер, қойын дәптеріне жазып жүрген қызықты оқиғалар да енгізілген.