Автордың қаламынан шыққан бұл роман, халқымыздың даңқты өнерпазының, Сегіз серінің өмір жолын суреттейді. Шығарма тоғыз тараудан және эпилогтан құрылған. Сегіз серінің от басын, шыққан тегін, өскен ортасын оқырманға таныстырады жазушы. Серінің Қызыл-жар, Омбы қалаларында оқыған жылдарын баяндай келе, патшалық Ресейге деген наразылығын да тілге тиек еткен. Сегіздің қанды көйлек досы Нияз екеуі бірігіп, патшалық әскермен соғысып, елден жылыстауға мәжбүр болғандарын көрсетеді. Одан кейіңгі Сыр бойындағы өмірі, Қоқан хандығына қарсы күрес жолы суреттеледі... Мүкәрәма сұлуға, Мақпал қызға деген маһаббаты; ғашықтарына арналған әндерінің тууын жатық тілмен жеткізеді.
Сегіздің өнердегі жолына, Ресей империясымен, Қоқан билігімен қарсыласқан әрекеттеріне, өз елінің болашағы жөніндегі ой-толғаныстарына кеңінен тоқталады автор.
Шығарма жастар қауымын отанды сүюге, өнерді дәріптеуге, ізгілік пен парасатқа баулып бағады.