Ғабит Мүсірепов – елу жылдан аса толассыз қалам тербеп, проза мен драматургия саласында кілең біртума, үздік туындылар берген, қазақ әдебиеті мен мәдениетінің, ұлттық ойының тарихында асқар шыңдай ерекше орын алатын аса көрнекті көркем сөз зергері. Оның ана тіліміздің телегей-теңіз байлығын нәзік талғаммен, қас суреткерге тән ғажайып шеберлікпен пайдалануы, стиль саралығы, не жазса да шынайы жазуы – бүгінгі талғамды оқырманның талабын толық ақтап отыр.