Өлең - ақынның өмірі, сыры, шыны, қуанышы-сүйініші, реніші-мұңы, қысқасы қаламгердің сөзі - өзі. Қанша жармассаң да, жүйріктің жалынан үнемі айрылмаймын дегеніңмен, бір күні сусып сауырынан сыпырылып түсеріңді білесің. Фәнидің алдамшылығын ілгерілі-кейінді талай ғұлама ақындарымыз айтып өткен. Менің соңғы он шақты жылдың жүзінде жазғандарымды топтап "ДҮНИЕ ЖАЛҒАН" деп оқырмандарыма ұсынуым да содан. Шығармаларым осы жылдардың ішінде түгелге дерлік мерзімді баспасөзде жарияланып, азды-көпті жұртшылықтан бағасын алған дүниелер. Бірталай газет-жүрналдарда оң пікірлер болған. Алдағы ең үлкен бағалаушым - сөз қадірін ұғатын ел-жұртым болса, басты мұрат сол.