ӨСКЕМЕН. 5 ақпан. Биыл Шығыс өңірінде Қазақстан Республикасы Конституциясының 20 жылдығына орай «Жеті Жарғыдан Конституцияға дейінгі егеменді мемлекет» атты ведомствоаралық акция өтеді. Оған облыстың барлық деңгейдегі прокуратура, сот, әділет, мемлекеттік қызмет істері және сыбайлас жемқорлыққа қарсы күрес агенттігінің өкілдері мен мәслихат депутаттары қатысады. Бұл туралы egemen.kz тілшісі хабарлады.

«ҚР Конституциясының 20 жылдығын мерекелеуге арналған маңызды қоғамдық шаралар облыс көлемінде жыл бойы өткізіледі. Шаралардың негізгі басымдығы құқықтық мәдениетті қалыптастыру, мемлекет қызметінде заңның үстемдік ететінін насихаттауға бағытталады. Бұл шараларға өңірдегі барлық қалалар мен аудандардағы жастар да, ардагерлер де қатыса алады», – деді облыс әкімінің орынбасары Жақсылық Омар.

Шығыс Қазақстан облысының ақпараттық орталығында БАҚ өкілдерімен брифинг өткізген Ж.Омардың айтуынша, мерейтойдың мерекелік бағдарламасы шеңберінде ғылыми-тәжірибелік конференциялар, дәрістер, сынып сағаттары, патриоттар форумы, мерекелік шерулер сияқты көптеген шаралар ұйымдастырылады.

Ал тамыз айында шығысқазақстандықтар жалпыхалықтық акция аясында Конституция күнінде 16 жасқа толған азаматтарға жеке куәлікті тапсыру салтанатына куә болады. Бұл шара Өскеменнің барлық тұсынан көрініп тұратын мемлекеттік рәміздер орналасқан Ботпай тауында өтеді. Онда жылдағы дәстүр бойынша жас мемлекеттік қызметкерлер де салтанатты түрде ант қабылдайды.

Сондай-ақ «Мен – Қазақстан Республикасының азаматымын!» атты облыстық флэш-моб акциясы өтеді. Акция шеңберінде мектеп жасына дейінгі балалар бір мезетте еліміздің Әнұранын шырқайды.

Думан Анаш.

Дерек: egemen.kz.

Сурет: Шығыс Қазақстан облысының ақпараттық орталығы.

// Егемен Қазақстан. - 2015. - 5 ақпан